ពោធិ៍សាត់៖ ស្ពានតេជោសន្តិភាពឬស្សីជ្រុំ ដែលត្រូវបានគេស្គាល់ទូទៅថា ស្ពានខ្ពស់ គឺជាគោលដៅទេសចរណ៍ធម្មជាតិដ៏មានប្រជាប្រិយភាពមួយ មានទីតាំងស្ថិតនៅក្នុងឃុំអូរសោម ស្រុកវាលវែង ខេត្តពោធិ៍សាត់។ ទីកន្លែងនេះកំពុងទទួលបានការយកចិត្តទុកដាក់ខ្ពស់ពីសំណាក់លោក ធាង ឡេង អភិបាលនៃគណៈអភិបាលស្រុកវាលវែង ក្នុងការលើកកម្ពស់សោភណ្ឌភាព និងអនាម័យ ដើម្បីផ្តល់ភាពស្រស់បំព្រង និងផាសុខភាពជូនដល់ភ្ញៀវទេសចរជាតិ និងអន្តរជាតិដែលអញ្ជើញមកទស្សនា។ ក្រុមការងារមូលដ្ឋានដឹកនាំដោយលោក ឆេន កែន មេឃុំអូរសោម រួមជាមួយក្រុមប្រឹក្សាឃុំ ប្រធានមណ្ឌលសុខភាព មេភូមិ និងកម្លាំងប្រជាការពារភូមិ បានចុះផ្ទាល់ដើម្បីរៀបចំសោភណ្ឌភាពនៅតំបន់ស្ពានខ្ពស់ នាថ្ងៃទី១៣ ១៤ ខែតុលា ឆ្នាំ២០២៦។ សកម្មភាពនេះមិនត្រឹមតែជួយកែលម្អបរិស្ថាន និងសោភណ្ឌភាពបៃតងនៅតាមដងផ្លូវ និងកន្លែងថតរូបប៉ុណ្ណោះទេ ប៉ុន្តែថែមទាំងបង្ហាញពីស្មារតីសហការ និងការយកចិត្តទុកដាក់ខ្ពស់របស់អាជ្ញាធរមូលដ្ឋាន ក្នុងការថែរក្សាអនាម័យបរិស្ថាន ដើម្បីត្រៀមស្វាគមន៍ភ្ញៀវទេសចរដែលស្រឡាញ់ធម្មជាតិមកលេងកម្សាន្តក្នុងតំបន់អូរសោមដ៏ស្រស់ត្រកាលនេះផងដែរ៕ សាយយ័ន្ដ វុន្នីយ៉ា

លោក ផាយ ឡេង អភិបាលក្រុងពោធិ៍សាត់ បានអញ្ជើញបើកវគ្គបណ្តុះបណ្តាលស្តីពី «មូលដ្ឋានគ្រឹះនៃការគ្រប់គ្រងអាជីវកម្ម» ជូនដល់អ្នកសេដ្ឋកិច្ចក្រៅប្រព័ន្ធ នៅសាលប្រជុំសាលាក្រុងពោធិ៍សាត់។ វគ្គបណ្តុះបណ្តាលមានរយៈពេល ២ថ្ងៃ ចាប់ពីរថ្ងៃទី១៤-១៥ ខែតុលា ឆ្នាំ២០២៦ ដោយផ្តោតលើការរៀបចំផែនការអាជីវកម្ម ហិរញ្ញវត្ថុ ទីផ្សារ និងប្រតិបត្តិការ ដើម្បីពង្រឹងសមត្ថភាព និងបង្កើនចំណូលដល់អ្នកប្រកបមុខរបរមូលដ្ឋាន។

អភិបាលស្រុកវាលវែង បានដឹកនាំកិច្ចប្រជុំប្រចាំខែតុលា លើវិស័យអប់រំ ដោយមានការចូលរួមពីអភិបាលរងស្រុក ការិយាល័យអប់រំ និងនាយក-នាយករងសាលា ដើម្បីពិនិត្យវឌ្ឍនភាពការងារ និងពង្រឹងគុណភាពអប់រំក្នុងមូលដ្ឋាន។

លោក ប្រាក់ អំចំណាន អភិបាលរងស្រុកស្រុកវាលវែង បានចុះពិនិត្យការសាងសង់អគារសិក្សា ១ខ្នង ៣បន្ទប់ និងដាំកូនឈើនៅ សាលាបឋមសិក្សា ខូយ រីដា ម្លប់ពោធិ៍ កតាអោន ដែលជាអំណោយរបស់ ឯកឧត្តម ខូយ រីដា អភិបាលខេត្តពោធិ៍សាត់ និង ឯកឧត្តម ភួ ពុយ អ្នកតំណាងរាស្ត្រខេត្តបាត់ដំបង ព្រមទាំងក្រុមគ្រួសារ ដើម្បីលើកកម្ពស់វិស័យអប់រំក្នុងមូលដ្ឋាន។

លោក ធាម សុផាត អភិបាលស្រុកភ្នំក្រវាញ បានចុះពិនិត្យស្ថានភាពទឹកជំនន់ដែលកំពុងកើនឡើង និងអំពាវនាវឱ្យប្រជាពលរដ្ឋបង្កើនការប្រុងប្រយ័ត្នខ្ពស់។ ជាមួយគ្នានេះ រដ្ឋបាលស្រុកបានសម្រេច ផ្អាកចរាចរណ៍បណ្ដោះអាសន្នលើស្ពានខ្សាច់ពូក ស្ពានតាណឹម ឃុំរកាត ជាបណ្ដោះអាសន្ន ដើម្បីធានាសុវត្ថិភាព រហូតទាល់តែស្ថានភាពទឹកស្រកចុះធម្មតាវិញ។

បងប្អូនប្រជាពលរដ្ឋជាច្រើនបានអញ្ជើញមកទទួលសេវាសាធារណៈយ៉ាងមមាញឹក នៅការិយាល័យច្រកចេញចូលតែមួយ ដែលដំណើរការយ៉ាងរលូន រៀបរយល្អ និងឆាប់រហ័សពីសំណាក់មន្ត្រីជំនាញ។