ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះជួបសំណេះសំណាល និងសាកសួរសុខទុក្ខយ៉ាងជិតស្និទ្ធ ជាមួយអ្នកបើកបររថយន្តក្រុង ព្រមទាំងបងប្អូនប្រជាពលរដ្ឋ និងកម្មករ កម្មការិនី ដែលត្រៀមខ្លួនធ្វើដំណើរវិលត្រឡប់ទៅកាន់រាជធានីភ្នំពេញវិញ ក្រោយពីបានមកស្រុកកំណើត ដើម្បីចូលរួមប្រារព្ធពិធីបុណ្យកាន់បិណ្ឌ និងភ្ជុំបិណ្ឌប្រពៃណីជាតិខ្មែរ ប្រកបដោយបរិយាកាសរីករាយ និងស្នាមញញឹម នាថ្ងៃទី១៣ ខែតុលា ឆ្នាំ២០២៦ នៅចំណតផ្សារភួរពុយ ស្ថិតក្នុងភូមិពោរតាគួយ សង្កាត់លលកស ក្រុងពោធិ៍សាត់ ខេត្តពោធិ៍សាត់។

ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញចូលរូមក្នុងពិធីហ្វឹកហ្វឺនកងអនុសេនាធំការពារដែនអាកាស កងពលតូចថ្មើរជើងលេខ៣១ ដោយគូសបញ្ជាក់ពីការយកចិត្តទុកដាក់ខ្ពស់របស់កម្លាំងជួរក្រោយចំពោះកងទ័ពជួរមុខ។

គណៈប្រតិភូរដ្ឋបាលខេត្តពោធិ៍សាត់ ដឹកនាំដោយ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ ដោយមានការអមដំណើរពីអភិបាលរងខេត្តពោធិ៍សាត់ ថ្នាក់ដឹកនាំមន្ទីរ​ អង្គភាព និងអាជ្ញាធរស្រុក ក្រុង បានអញ្ជើញចុះជួបសំណេះសំណាល សួរសុខទុក្ខ និងនាំយកអំណោយជាស្បៀង គ្រឿងឧបភោគបរិភោគ ផ្តល់ជូនដល់អង្គភាពកងទ័ព និងនគរបាលឈរជើងការពារព្រំដែន ស្ថិតក្នុងភូមិសាស្ត្រឃុំថ្មដា ស្រុកវាលវែង ខេត្តពោធិ៍សាត់ ក្នុងឱកាសអបអរសាទរបុណ្យភ្ជុំបិណ្ឌប្រពៃណីជាតិ នាថ្ងៃទី៩ ខែតុលា ឆ្នាំ២០២៦ ។

លោក លាង ទិតដ្ឋាន ប្រធានមន្ទីរព័ត៌មានខេត្តពោធិ៍សាត់ បានដឹកនាំមន្ត្រីរាជការក្រោមឱវាទ ចុះសួរសុខទុក្ខ និងនាំយកអំណោយជាគ្រឿងឧបភោគបរិភោគ ព្រមទាំងថវិកាមួយចំនួន ចែកជូនដល់គ្រួសារអតីតយុទ្ធជនចំនួន ៨ គ្រួសារ និងបានឧបត្ថម្ភថវិកាលើកទឹកចិត្តដល់កម្លាំងប្រជាការពារ ដែលកំពុងបំពេញភារកិច្ចនៅក្នុងភូមិអភិវឌ្ឍន៍ ប៊ុន រ៉ានី សែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់។

ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញជួបសំណេះសំណាល និងចែកអំណោយលើកទឹកចិត្តដល់ថ្នាក់ដឹកនាំ មន្ត្រីរាជការ និងបុគ្គលិកសាលាខេត្ត ក្នុងឱកាសបុណ្យភ្ជុំបិណ្ឌ នៅសាលប្រជុំទាពឧកញ៉ាឃ្លាំងមឿង។ ក្នុងនោះ ឯកឧត្តមបានកោតសរសើរដល់កិច្ចខិតខំប្រឹងប្រែងរបស់មន្ត្រី ក្រើនរំលឹកឱ្យរក្សា​សាមគ្គីភាព និងការទទួលខុសត្រូវខ្ពស់ ព្រមទាំងជូនពរជ័យ និងសុវត្ថិភាពដល់មន្ត្រីទាំងអស់ក្នុងការធ្វើដំណើរទៅជួបជុំគ្រួសារ។

លោកស្រី ប៉ុក ណាឌី អភិបាលរង តំណាងឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងលោកជំទាវ អាំង សុជាតា ខូយរីដា ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តពោធិ៍សាត់ បានអញ្ជើញដឹកនាំ មន្ត្រីរាជការ សមាជិកាសមាគមនារីខេត្តពោធិ៍សាត់ និងបងប្អូនប្រជាពុទ្ធបរិស័ទ ចូលរួមកាន់បិណ្ឌទី១២ នៅវត្តឯការាម ស្ថិតក្នុងសង្កាត់ចំរើនផល និងវត្តហ្លួង សង្កាត់លលកសក្រុងពោធិ៍សាត់។