ពោធិ៍សាត់៖ លោក ហៀម ឃួន អភិបាលរងខេត្ត និងជាប្រធានក្រុមការងាររាជរដ្ឋាភិបាលចុះមូលដ្ឋានសង្កាត់រលាប បានដឹកនាំក្រុមការងារ ចុះសួរសុខទុក្ខ និងនាំយកអំណោយមនុស្សធម៌ចែកជូនដល់ប្រជាពលរដ្ឋក្រីក្រ និងចាស់ជរាចំនួន ១៩គ្រួសារ រស់នៅក្នុងភូមិថ្មបីដុំ សង្កាត់រលាប ក្រុងពោធិ៍សាត់ ខេត្តពោធិ៍សាត់ ដើម្បីចូលរួមកាត់បន្ថយការលំបាកក្នុងជីវភាពរស់នៅប្រចាំថ្ងៃ។ ក្នុងឱកាសជួបសំណេះសំណាលនោះ លោក ហៀម ឃួន បានពាំនាំនូវការផ្តាំផ្ញើសួរសុខទុក្ខយ៉ាងជ្រាលជ្រៅពីសំណាក់ថ្នាក់ដឹកនាំគ្រប់លំដាប់ថ្នាក់ ជូនចំពោះបងប្អូនប្រជាពលរដ្ឋទាំងអស់ ដែលជានិច្ចកាល ថ្នាក់ដឹកនាំតែងតែយកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋនៅមូលដ្ឋាន ដោយមិនទុកឱ្យពលរដ្ឋណាម្នាក់រស់នៅក្នុងការបោះបង់ចោលឡើយ។ អំណោយដែលបានផ្តល់ជូនប្រជាពលរដ្ឋទាំង ១៩គ្រួសារ នាឱកាសនោះ ក្នុងមួយគ្រួសារទទួលបាន អង្ករ ១០ គីឡូក្រាម និងសារុង១។ ប្រជាពលរដ្ឋដែលទទួលបានអំណោយទាំងអស់ បានសម្តែងនូវក្តីរំភើបរីករាយ និងថ្លែងអំណរគុណយ៉ាងជ្រាលជ្រៅចំពោះ លោក ហៀម ឃួន ព្រមទាំងក្រុមការងារចុះមូលដ្ឋាន ដែលតែងតែគិតគូរ និងចុះមកជួយឧបត្ថម្ភគាំទ្រដល់ពួកគាត់ទាន់ពេលវេលា៕ សាយយ័ន្ដ វុន្នីយ៉ា

នាព្រឹកថ្ងៃអង្គារ ទី៦ ខែតុលា ឆ្នាំ២០២៦ លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ រួមជាមួយថ្នាក់ដឹកនាំ និងមន្ត្រីរាជការក្រោមឱវាទ បានចុះជួបសំណេះសំណាល សួរសុខទុក្ខ និងនាំយកអំណោយជាស្បៀងអាហារ គ្រឿងឧបភោគបរិភោគ ព្រមទាំងថវិកា ចែកជូនដល់គ្រួសារអតីតយុទ្ធជនចំនួន ៨ គ្រួសារ ដែលជាសម្ព័ន្ធមេត្រីភាពជាមួយមន្ទីរអភិវឌ្ឍន៍ជនបទខេត្ត រស់នៅភូមិប៊ុនរ៉ានីសែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់។

ដើម្បីចូលរួមចំណែកក្នុងការថែរក្សា លើកកម្ពស់ប្រពៃណីទំនៀមទម្លាប់ជាតិ និងបង្កើនបរិយាកាសរីករាយក្នុងឱកាសបុណ្យប្រពៃណីជាតិ អាជ្ញាធរស្រុកក្រគរ ក្រោមការដឹកនាំរបស់លោកអភិបាលស្រុក បានរៀបចំបំពាក់ប៉ាណូផ្សព្វផ្សាយ និងសារអបអរសាទរពិធីបុណ្យកាន់បិណ្ឌ និងភ្ជុំបិណ្ឌ ឆ្នាំ២០២៦ នៅតាមទីតាំងសំខាន់ៗក្នុងដែនសមត្ថកិច្ច នាថ្ងៃទី០៦ ខែតុលា ឆ្នាំ២០២៦។

អភិបាលស្រុកកណ្ដៀង បានដឹកនាំមន្ត្រីរដ្ឋបាលស្រុក នាំយកអំណោយជាស្បៀងអាហារ (អង្ករ មី ទឹកត្រី ទឹកស៊ីអ៊ីវ) និងថវិកា ទៅចែកជូនគ្រួសារអតីតយុទ្ធជនសម្ព័ន្ធមេត្រីភាពចំនួន ៨គ្រួសារ នៅភូមិប៊ុន រ៉ានី សែនជ័យ ដំណាក់ទ្រយឹង ដើម្បីជួយសម្រាលការលំបាក និងបង្ហាញពីការយកចិត្តទុកដាក់។ ក្នុងនោះ មេភូមិ ប្រជាការពារ និងមេក្រុមសរុបចំនួន ៨នាក់ ក៏ទទួលបានថវិកាឧបត្ថម្ភផងដែរ។

អភិបាលស្រុកក្រគរ បានអញ្ជើញជាអធិបតីក្នុងកិច្ចប្រជុំការងារអប់រំ ស្តីពីការត្រៀមរៀបចំបវេសនកាល ឆ្នាំសិក្សា ២០២៦-២០២៧ នៅសាលប្រជុំការិយាល័យអប់រំ យុវជន និងកីឡាស្រុកក្រគរ ខេត្តពោធិ៍សាត់។ កិច្ចប្រជុំនេះផ្ដោតលើការត្រៀមលក្ខណៈសម្បត្តិ ការពង្រឹងគុណភាពអប់រំ វិន័យ សោភ័ណភាពសាលារៀន និងការជំរុញការចុះឈ្មោះចូលរៀន ដើម្បីធានាប្រសិទ្ធភាពសម្រាប់ឆ្នាំសិក្សាថ្មី។

ពោធិ៍សាត់៖ អង្គភាពពន្ធនាគារខេត្តពោធិ៍សាត់ បានរៀបចំពិធីសូត្រមន្ត បង្សុកូល និងរាប់បាត្រ ដើម្បីអបអរសាទរ និងឧទ្ទិសកុសល នាព្រឹកថ្ងៃទី៦ ខែតុលា ឆ្នាំ២០២៦នេះ ក្នុងឱកាសពិធីបុណ្យភ្ជុំបិណ្ឌដែលនឹងឈានចូលមកដល់នាពេលខាងមុខ។ ពិធីនេះត្រូវបានរៀបចំឡើងក្រោមការដឹកនាំរបស់ លោក វរអគ្គានុរក្សថ្នាក់លេខ២ ស៊ិន សុផាន់ណូ ប្រធានពន្ធនាគារខេត្តពោធិ៍សាត់ ព្រមទាំងមានការចូលរួមពីសំណាក់ថ្នាក់ដឹកនាំ និងមន្ត្រីរាជការទាំងអស់នៃអង្គភាព។ ក្នុងឱកាសនោះ អង្គភាពបាននិមន្តព្រះសង្ឃចំនួន ៤អង្គ គង់នៅវត្តសុវណ្ណគិរី (ហៅវត្តទួលវែង) និងអញ្ជើញលោកតាអាចារ្យចំនួន ២រូប ដើម្បីប្រព្រឹត្តទៅតាមគន្លងប្រពៃណីព្រះពុទ្ធសាសនា ក្នុងការសូត្រមន្ត បង្សុកូល រាប់បាត្រ និងឧទ្ទិសកុសលផលបុណ្យជូនដល់បុព្វការីជនដែលបានចែកឋានទៅ។ បន្ថែមពីនេះ ដើម្បីបង្កើតបរិយាកាសរីករាយ និងផ្ដល់កំលាំងចិត្ត អង្គភាពបានអនុញ្ញាតឱ្យជនជាប់ឃុំចំនួន ៧៥នាក់ (ក្នុងនោះមានស្ត្រី ២៦នាក់) បានចូលរួមក្នុងពិធីរាប់បាត្រ ប្រគេនទេយ្យទាន និងបច្ច័យផ្ទាល់ដៃដល់ព្រះសង្ឃ។ ទន្ទឹមនឹងនេះ អង្គភាពក៏បានរៀបចំធ្វើសម្លការីនំបុ័ងយ៉ាងប្រណិត ចែកជូនដល់ជនជាប់ឃុំទាំងអស់តាមបន្ទប់នីមួយៗប្រកបដោយបរិយាកាសស្និទ្ធស្នាល និងមនុស្សធម៌៕