ពោធិ៍សាត់៖ មន្ទីរសុខាភិបាលខេត្តពោធិ៍សាត់ បានរៀបចំកិច្ចប្រជុំពិភាក្សាលើការស្នើសុំធាតុចូលសម្រាប់ «គម្រោងសាកល្បងសមាហរណកម្មគ្រប់គ្រងករណីសត្វខាំ ក្នុងវិស័យសុខាភិបាល និងសុខភាពសត្វ» ក្រោមអធិបតីភាព លោក តឹក សុភាព ប្រធានមន្ទីរសុខាភិបាលខេត្តពោធិ៍សាត់ កាលពីថ្ងៃទី៩ ខែកញ្ញា ឆ្នាំ២០២៦ ។ កិច្ចប្រជុំនេះ មានការចូលរួមពី លោក មួន វុឌ្ឍី អនុប្រធានការិយាល័យផលិតកម្ម និងបសុព្យាបាល ព្រមទាំងមន្ត្រីអមដំណើរ ២រូប ជាមួយតំណាងមន្ទីរសុខាភិបាល និងមន្ត្រីនៃអង្គការ WVS សរុបចំនួន ១០ រូប (ក្នុងនោះស្ត្រី ២ រូប)។ អង្គប្រជុំបានផ្តោតលើរបៀបវារៈសំខាន់ៗមួយចំនួន រួមមាន៖ ការពង្រឹងកិច្ចសហប្រតិបត្តិការជិតស្និទ្ធរវាងការិយាល័យផលិតកម្ម និងបសុព្យាបាល ជាមួយមន្ទីរសុខាភិបាល, ការរៀបចំផែនការសកម្មភាពច្បាស់លាស់សម្រាប់អនុវត្តបន្ត, ការបង្កើតប្រព័ន្ធរាយការណ៍ និងប្រមូលទិន្នន័យជនរងគ្រោះដែលទទួលរងការខាំពីសត្វ និងបានចាក់វ៉ាក់សាំងបង្ការជំងឺឆ្កែឆ្កួត ព្រមទាំងការដាក់ចេញនូវវិធានការតាមដាន និងស្រាវជ្រាវអង្កេតអំពីជំងឺឆ្កែឆ្កួតឱ្យកាន់តែមានប្រសិទ្ធភាពក្នុងខេត្ត៕ ( សេក ញន )

សមិទ្ធផលដ៏ធំធេងនេះ ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី៩ ខែមិថុនា ឆ្នាំ២០២៦ កន្លងទៅ ក្រោមអធិបតីភាព ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល, ឯកឧត្តម Kim Changyong ឯកអគ្គរដ្ឋទូតសាធារណរដ្ឋកូរ៉េ ប្រចាំកម្ពុជា, ឯកឧត្តម ខូយ រីដា អភិបាលខេត្តពោធិ៍សាត់ ព្រមទាំងថ្នាក់ដឹកនាំនៃអង្គការ KOFIH។

ពិធីប្រគល់ឧបករណ៍វេជ្ជសាស្ត្រ និងរាវរកសារធាតុវិទ្យុសកម្ម ជូនមន្ទីរសុខាភិបាលខេត្តពោធិ៍សាត់ ដែលជាកិច្ចសហប្រតិបត្តិការរវាង ក្រសួងរ៉ែ និងថាមពល ជាមួយ ទីភ្នាក់ងារ IAEA ដើម្បីពង្រឹងសុវត្ថិភាពវិទ្យុសកម្ម និងសមត្ថភាពព្យាបាលជំងឺជូនប្រជាពលរដ្ឋ។

ខេត្តពោធិ៍សាត់៖ ក្រុមនិស្សិតថ្នាក់អនុបណ្ឌិតផ្នែកគ្រប់គ្រងរដ្ឋបាលមន្ទីរពេទ្យ មកពីវិទ្យាស្ថានជាតិសុខភាពសាធារណៈ (NIPH) បានចាប់ផ្តើមដំណើរចុះកម្មសិក្សាស្រាវជ្រាវរយៈពេល ២ថ្ងៃ (ចាប់ពីថ្ងៃទី១៨ ដល់ថ្ងៃទី១៩ ខែកក្កដា ឆ្នាំ២០២៦) នៅមណ្ឌលសុខភាពកំពង់លួង ខេត្តពោធិ៍សាត់ នាព្រឹកថ្ងៃសៅរ៍ ទី១៨ ខែកក្កដា ឆ្នាំ២០២៦។ ការចុះកម្មសិក្សានាឱកាសនេះ គឺធ្វើឡើងក្នុងគោលបំណងសិក្សាស្រាវជ្រាវយ៉ាងស៊ីជម្រៅលើគម្រោង៖ ការកែលម្អការផ្តល់សេវាសុខភាពតាមរយៈវិធីសាស្ត្រ WISN (Workload Indicators of Staffing Need) និងការអន្តរាគមន៍ឱ្យប្រសើរឡើងនូវគុណភាព។ ការស្រាវជ្រាវនេះ នឹងដើរតួនាទីយ៉ាងសំខាន់ក្នុងការវាយតម្លៃលើបន្ទុកការងារ និងតម្រូវការមន្ត្រីសុខាភិបាល ដើម្បីស្វែងរកដំណោះស្រាយ និងយុទ្ធសាស្ត្រគន្លឹះៗ ក្នុងការជួយជម្រុញ និងលើកកម្ពស់គុណភាពនៃការផ្តល់សេវាថែទាំសុខភាពជូនដល់ប្រជាពលរដ្ឋនៅក្នុងមូលដ្ឋានឱ្យកាន់តែមានប្រសិទ្ធភាពខ្ពស់បន្ថែមទៀត៕

លោកជំទាវ អាំង សុជាតា ខូយ រីដា អនុប្រធានកិត្តិយស និងជាប្រធានក្រុមការងារឥស្សរជនឆ្នើមថ្នាក់ជាតិ នៃសាខាកាកបាទក្រហមកម្ពុជា ខេត្តពោធិ៍សាត់ បានដឹកនាំក្រុមការងារចុះសួរសុខទុក្ខ ផ្តល់ការអប់រំសុខភាព និងអំណោយមនុស្សធម៌ ដល់ស្ត្រីមានផ្ទៃពោះ ស្ត្រីត្រៀមសម្រាល ស្ត្រីសម្រាលកូនរួច និងអ្នកផ្ទុកមេរោគអេដស៍ សរុប១២នាក់ នៅមណ្ឌលសុខភាពស្វាយដូនកែវ ស្រុកបាកាន ខេត្តពោធិ៍សាត់ នៅព្រឹកថ្ងៃទី១៧ ខែកក្កដា ឆ្នាំ២០២៦។

មណ្ឌលសុខភាពកំពង់លួងដែលជាមណ្ឌលសុខភាពបណ្ដែតទឹកតែមួយគត់នៅប្រទេសកម្ពុជា មានផ្ដល់សេវាសុខភាព២៤ម៉ោងលើ២៤ម៉ោង ជារៀងរាល់ថ្ងៃ មិនថាថ្ងៃបុណ្យ ឬថ្ងៃឈប់សម្រាកទេ