ពោធិ៍សាត់៖ កិច្ចប្រជុំ គ.ក.ស.ក ប្រចាំខែកញ្ញា អាណត្តិទី៤ ដែលបានប្រព្រឹត្តទៅនៅសាលប្រជុំថ្មកែវ (ជាន់ទី២) នៃសាលាខេត្តពោធិ៍សាត់ នាថ្ងៃទី៣០ ខែកញ្ញា ឆ្នាំ២០២៦ កិច្ចប្រជុំនេះបានប្រព្រឹត្តទៅក្រោមអធិបតីភាព លោកជំទាវ ឈឹម ស៊ីណា សមាជិកាក្រុមប្រឹក្សាខេត្ត និងជាប្រធាន គ.ក.ស.ក ខេត្ត ព្រមទាំង លោកជំទាវ ម៉ែន ផល្លី សមាជិកាក្រុមប្រឹក្សាខេត្ត និងជាអនុប្រធាន គ.ក.ស.ក ខេត្តពោធិ៍សាត់។ កិច្ចប្រជុំប្រចាំខែនេះ មានការអញ្ជើញចូលរួមពីសំណាក់ថ្នាក់ដឹកនាំ សមាជិកា និងតំណាងស្ថាប័នពាក់ព័ន្ធ សរុបចំនួន ២៨នាក់ (ស្រីទាំង ២៨នាក់) ដើម្បីពិភាក្សា និងពិនិត្យលើលទ្ធផលការងារកន្លងមក ព្រមទាំងលើកទិសដៅអនុវត្តបន្ត ក្នុងការលើកកម្ពស់កិច្ចការស្ត្រី និងកុមារក្នុងខេត្តឱ្យកាន់តែមានប្រសិទ្ធភាព៕

អំណោយដែលបាននាំយកមកចែកជូននាពេលនេះ គឺជាការយកចិត្តទុកដាក់ខ្ពស់ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូរពីសុខទុក្ខ និងជីវភាពរស់នៅរបស់បងប្អូនប្រជាពលរដ្ឋជួបការលំបាក និងរងគ្រោះដោយសារគ្រោះមហន្តរាយផ្សេងៗ ដោយមិនទុកឱ្យប្រជាពលរដ្ឋណាម្នាក់រងគ្រោះដោយអត់ស្បៀងអាហារនោះឡើយ។

លោកស្រី ប៉ុក ណាឌី អភិបាលរងខេត្តពោធិ៍សាត់ បានអញ្ជើញជាអធិបតីក្នុងពិធីចែកកង់, អង្ករ និងសម្ភារសិក្សា ជូនសិស្សក្រីក្រ ១០០នាក់ មកពីអនុវិទ្យាល័យចំនួន៤ ក្នុងខេត្ត ដែលជាជំនួយឧបត្ថម្ភពីសមាគមរ៉ូតារីពោធិ៍សាត់ និងសមាគមរ៉ូតារីសេនតូសា (សិង្ហបុរី)។ ក្នុងពិធីនេះ លោកស្រីបានថ្លែងអំណរគុណដល់សមាគមដៃគូ និងបានផ្តាំផ្ញើឱ្យសិស្សានុសិស្សទាំងអស់ខិតខំរៀនសូត្រ មិនត្រូវបោះបង់ការសិក្សា ព្រមទាំងចេះថែរក្សាកង់ និងគោរពច្បាប់ចរាចរណ៍ឲ្យបានល្អ។

ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញជាអធិបតីភាពក្នុងពិធីប្រគល់ផ្ទះលេខ២៣ ព្រមទាំងដីឡូតិ៍ជាប់ផ្ទះ ដែលជាអំណោយដ៏ថ្លៃថ្លារបស់ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រគល់ជូនអ្នកគ្រូ ប៊ុន ចាន់ធាវី នៅភូមិបឹងយារ ឃុំវាល ស្រុកកណ្តៀង នាថ្ងៃទី២៨ ខែកញ្ញា ឆ្នាំ២០២៦។

ពោធិ៍សាត់៖ ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញជាអធិបតីក្នុងពិធីជួបសំណេះសំណាល និងប្រកាសបិទផ្សាយជាសាធារណៈនូវឯកសារនៃការវិនិច្ឆ័យទិន្នន័យក្បាលដី សម្រាប់៥ភូមិ គឺភូមិឈើទែប ភូមិក្រាំងខឿន ភូមិចាមចាស់ ភូមិចាមថ្មី និងភូមិដង្កៀបក្តាម ស្ថិតក្នុងឃុំឈើតុំ ស្រុកក្រគរ ខេត្តពោធិ៍សាត់ ពិធីនេះប្រារព្ធធ្វើឡើងនៅបរិវេណវត្តទួលត្បែង ដោយមានការចូលរួមពីមន្ទីរជំនាញពាក់ព័ន្ធ អាជ្ញាធរមូលដ្ឋាន និងប្រជាពលរដ្ឋយ៉ាងច្រើនកុះករ នាថ្ងៃទី២៨ ខែកញ្ញា ឆ្នាំ២០២៦។ ពិធីនេះធ្វើឡើងដើម្បីផ្តល់ឱកាសឱ្យប្រជាពលរដ្ឋបានពិនិត្យផ្ទៀងផ្ទាត់ទិន្នន័យក្បាលដី និងទ្រព្យសម្បត្តិរបស់ខ្លួនឱ្យបានត្រឹមត្រូវ មុននឹងឆ្ពោះទៅរកការបែងចែកប័ណ្ណកម្មសិទ្ធិដីធ្លីស្របច្បាប់ជូនពួកគាត់នាពេលខាងមុខ៕​ សាយយ័ន្ដ វុន្នីយ៉ា​

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះពិនិត្យដោយផ្ទាល់នូវសកម្មភាពរៀបចំ ជួសជុលកែលម្អ អនាម័យ បរិស្ថាន និងសោភ័ណភាព នៅសាលាបឋមសិក្សា និងអនុវិទ្យាល័យអូរដេកា ស្ថិតក្នុងភូមិអូរដេកា ឃុំប្រម៉ោយ ស្រុកវាលវែង និងអនុវិទ្យាល័យសម្តេចឪ សម្តេចម៉ែ ស្ថិតក្នុងស្រុកភ្នំក្រវាញ ខេត្តពោធិ៍សាត់ នាព្រឹកថ្ងៃទី២៧ ខែកញ្ញា ឆ្នាំ២០២៦។ ការចុះពិនិត្យនាឱកាសនោះ ធ្វើឡើងក្នុងគោលបំណងជំរុញការរៀបចំបរិវេណសាលារៀនឱ្យមានអនាម័យ បរិស្ថានបៃតង និងសោភ័ណភាពស្រស់ស្អាត ដើម្បីបង្កើតបរិយាកាសសិក្សាប្រកបដោយសុខុមាលភាព សុវត្ថិភាព និងភាពទាក់ទាញដល់សិស្សានុសិស្ស ក៏ដូចជាលោកគ្រូ-អ្នកគ្រូ។ ក្នុងសកម្មភាពនេះ ឯកឧត្តមអភិបាលខេត្ត បានណែនាំដល់អាជ្ញាធរដែនដី និងគណៈគ្រប់គ្រងសាលា ឱ្យបន្តយកចិត្តទុកដាក់លើការគ្រប់គ្រងសំរាម ការដាំដើមឈើ និងផ្កាលម្អ ព្រមទាំងការជួសជុលថែទាំហេដ្ឋារចនាសម្ព័ន្ធសាលារៀនឱ្យបានមាំទាំ និងមានរបៀបរៀបរយជាប្រចាំ៕ សាយយ័ន្ដ វុន្នីយ៉ា