ពោធិ៍សាត់៖ វត្តកែវវិជ័យ ស្ថិតនៅស្រុកកណ្តៀង ខេត្តពោធិ៍សាត់ កំពុងតែទាក់ទាញអារម្មណ៍ និងការជ្រះថ្លាយ៉ាងខ្លាំងពីសំណាក់ពុទ្ធសាសនិក និងភ្ញៀវទេសចរជិតឆ្ងាយ តាមរយៈការកសាង «ព្រះពុទ្ធបដិមាអភយមុទ្រ» ដ៏ខ្ពស់ស្កឹមស្កៃជិត ៤៩.៩ម៉ែត្រ ព្រមទាំងទិដ្ឋភាពភ្លើងពណ៌ដ៏ស្រស់ត្រកាលនារាត្រី។ ព្រះពុទ្ធបដិមាអភយមុទ្រ ដែលមានកម្ពស់រហូតដល់ ៤៩.៩ម៉ែត្រនេះ ត្រូវបានកសាងឡើងយ៉ាងប្រណិត និងស្កឹមស្កៃលើទឹកដីស្រុកកណ្តៀង ដោយស្តែងចេញពីសិល្បៈស្ថាបត្យកម្មពុទ្ធសាសនាដ៏រស់រវើក និងបង្ហាញពីនិមិត្តរូបនៃសន្តិភាព និងភាពស្ងប់ស្ងាត់ក្នុងចិត្ត។ វត្តមាននៃព្រះពុទ្ធបដិមាដ៏ធំស្កឹមស្កៃនេះ បានប្រែភូមិសាស្ត្រវត្តកែវវិជ័យ ឱ្យក្លាយជាទីសក្ការបូជា និងជាគោលដៅទេសចរណ៍សាសនាដ៏សំខាន់មួយប្រចាំខេត្តពោធិ៍សាត់។ នៅពេលព្រះអាទិត្យរៀបអស្ដង្គត ទិដ្ឋភាពពេលរាត្រីនៅក្នុងទីអារាមនេះត្រូវបានដេញភ្លើងពណ៌យ៉ាងប្រណិត បំភ្លឺជុំវិញព្រះបដិមា និងសំណង់សាសនានានា។ ពន្លឺភ្លើងពណ៌នាពេលរាត្រីមិនត្រឹមតែបង្កើតបានជាទិដ្ឋភាពដ៏អស្ចារ្យ ស្រស់ស្អាតប្លែកភ្នែកប៉ុណ្ណោះទេ ប៉ុន្តែថែមទាំងផ្តល់នូវបរិយាកាសស្ងប់ស្ងាត់ កក់ក្តៅ និងជ្រះថ្លា សម្រាប់ពុទ្ធបរិស័ទដែលមកធ្វើការអុជធូបបួងសួង និងទស្សនាកម្សាន្តផងដែរ៕

ពោធិ៍សាត់៖ វត្តពុទ្ធារាម ដែលប្រជាពលរដ្ឋក្នុងតំបន់ទម្លាប់ហៅថា «វត្តភូមិស្ទឹង» ស្ថិតនៅក្នុងស្រុកកណ្តៀង ខេត្តពោធិ៍សាត់ គឺជាទីអារាមមួយដែលមានបរិយាកាសស្ងប់ស្ងាត់ ឆើតឆាយ និងពោរពេញដោយជំនឿសាសនាយ៉ាងជ្រាលជ្រៅពីសំណាក់ពុទ្ធសាសនិកជនជិតឆ្ងាយ។ ទិដ្ឋភាពទូទៅនៅក្នុងទីអារាមនេះ មានសំណង់អាគារសាសនា ដូចជាព្រះវិហារ និងសាលាឆទាន ត្រូវបានកសាងឡើងយ៉ាងប្រណិត ជាមួយនឹងរចនាបថស្ថាបត្យកម្មខ្មែរបុរាណ និងទំនើបបញ្ចូលគ្នា ឆ្លុះបញ្ចាំងពីសិល្បៈចម្លាក់ដ៏ប៉ិនប្រសប់។ នៅក្នុងឱកាសបុណ្យទាន និងពិធីសាសនានានា វត្តភូមិស្ទឹងតែងតែទទួលស្វាគមន៍ពុទ្ធបរិស័ទយ៉ាងច្រើនកុះករដែលបានមកជួបជុំគ្នា ដើម្បីប្រកបពិធីសាសនា ស្តាប់ធម៌ទេសនា រាប់បាត្រ និងបង្សុកូល ឧទ្ទិសកុសលជូនដល់បុព្វការីជន។ បរិយាកាសដ៏កក់ក្តៅ និងភាពស្ងប់ស្ងាត់នៃទីអារាមនេះ មិនត្រឹមតែជាកន្លែងស័ក្តិសិទ្ធិសម្រាប់ទីពឹងខាងវិញ្ញាណប៉ុណ្ណោះទេ ប៉ុន្តែថែមទាំងជាទីតាំងប្រវត្តិសាស្ត្រ និងវប្បធម៌ដ៏សំខាន់មួយដែលរួមចំណែកថែរក្សាអត្តសញ្ញាណជាតិ និងប្រពៃណីព្រះពុទ្ធសាសនានៅក្នុងខេត្តពោធិ៍សាត់៕

លោកស្រី សំ ដានី ប្រធានការិយាល័យវិទ្យុជាតិខេត្តពោធិ៍សាត់ តំណាងលោក លាង ទិតដ្ឋាន ប្រធានមន្ទីរព័ត៌មានខេត្ត បានដឹកនាំក្រុមការងារនាំយកគ្រឿងឧបភោគ បរិភោគ (មី ទឹកសុទ្ធ ទឹកក្រូច) និងបច្ច័យ ២០ម៉ឺនរៀល ទៅប្រគេនព្រះសង្ឃក្នុងពិធីបុណ្យកាន់បិណ្ឌនៅ វត្តហ្លួង ស្ថិតក្នុងសង្កាត់លលកស ក្រុងពោធិ៍សាត់ ដើម្បីចូលរួមទ្រទ្រង់ព្រះសង្ឃ និងរួមចំណែកលើកស្ទួយប្រពៃណីព្រះពុទ្ធសាសនា។

លោក ចាន់ វិចិត្រ អភិបាលស្រុកតាលោសែនជ័យ និងព្រះអនុគុណស្រុក បានដឹកនាំកិច្ចប្រជុំត្រៀមលក្ខណៈអបអរសាទរពិធីបុណ្យកាន់បិណ្ឌ និងភ្ជំបិណ្ឌ ជាមួយព្រះគ្រូចៅអធិការ និងអាចារ្យវត្តទាំង២២ រួមទាំងអាជ្ញាធរមូលដ្ឋាន។ កិច្ចប្រជុំនេះផ្តោតលើការយកចិត្តទុកដាក់ខ្ពស់ចំពោះ ការងារសន្តិសុខ សណ្តាប់ធ្នាប់ និង អនាម័យបរិស្ថាន តាមទីអារាមនានា ដើម្បីធានាឱ្យដំណើរការបុណ្យប្រពៃណីជាតិប្រព្រឹត្តទៅដោយរលូន និងមានសុវត្ថិភាពល្អប្រសើរ។

ក្រុមការងារមន្ទីរវប្បធម៌ និងវិចិត្រសិល្បៈ ខេត្តពោធិ៍សាត់ បានចុះប្រមូល និងទទួលយកវត្ថុបេតិកភណ្ឌពីឃុំបឹងបត់កណ្តោល ស្រុកបាកាន យកទៅរក្សាទុក ចុះបញ្ជី និងសិក្សាស្រាវជ្រាវតាមបច្ចេកទេស ដើម្បីការពារ និងអភិរក្សសម្បត្តិវប្បធម៌ជាតិឱ្យបានគង់វង្ស។

សេចក្តីជូនដំណឹង បន្តហាត់រៀនសិល្បៈដោយឥតគិតថ្លៃ! មន្ទីរវប្បធម៌ និងវិចិត្រសិល្បៈខេត្តពោធិ៍សាត់ សូមជូនដំណឹងដល់ សិស្សានុសិស្ស និងសិក្ខាកាមសិល្បៈ ដែលបានបញ្ចប់ការហាត់រៀនសិល្បៈក្នុង វគ្គបណ្តុះបណ្តាលសិល្បៈ វគ្គ១ ឆ្នាំ២០២៦ ឱ្យបានជ្រាបថា មន្ទីរនឹងរៀបចំបើក វគ្គបណ្តុះបណ្តាលសិល្បៈ វគ្គ២ ឆ្នាំ២០២៦ ដើម្បីឱ្យសិស្សានុសិស្សអាចបន្តអភិវឌ្ឍសមត្ថភាព និងជំនាញសិល្បៈរបស់ខ្លួន។