ពោធិ៍សាត់៖ លោក ធាង ឡេង អភិបាលនៃគណៈអភិបាលស្រុកវាលវែង និងលោកអភិបាលរង រួមជាមួយលោកនាយករដ្ឋបាលស្តីទី ប្រធាន និងអនុប្រធានការិយាល័យចំណុះរដ្ឋបាលស្រុក បានអញ្ជើញចុះប្រគល់ស្បៀង គ្រឿងឧបភោគបរិភោគ បន្លែ និងនំអន្សម ដែលជាអំណោយសប្បុរសធម៌ទទួលបានពីព្រះចៅអធិការវត្តមួយចំនួនក្នុងស្រុកវាលវែង ជូនដល់វីរជនកងទ័ពជួរមុខ ដែលជាអង្គភាពសហសម្ព័ន្ធមេត្រីភាពជាមួយរដ្ឋបាលស្រុកវាលវែង នាថ្ងៃទី១២ ខែតុលា ឆ្នាំ២០២៦។ អំណោយស្បៀង និងសម្ភារដែលបានប្រគល់ រួមមាន៖ អង្ករ ៣៥០ គីឡូក្រាម, បន្លែចម្រុះ ១៥០ គីឡូក្រាម, អន្សម ៥០០ ដើម,​ មីកញ្ចប់ ១១ កេះ, ទឹកផ្លែឈើ ៧ កេះ, ទឹកបរិសុទ្ធ ៤​ កេះ, ទឹកបរិសុទ្ធ ៧ យួរ, ទឹកស៊ីអ៊ីវ ១០ យួរ, ទឹកត្រី ២ យួរ, សៀង ១០ គីឡូក្រាម, នឹង ទឹកដោះគោខាប់ ៥ កំប៉ុង។ សកម្មភាពចុះជួបសំណេះសំណាល និងនាំយកអំណោយឧបត្ថម្ភនេះ គឺដើម្បីជាការរួមចំណែកលើកទឹកចិត្ត និងឆ្លើយតបចំពោះការលះបង់ដ៏ធំធេងរបស់កងទ័ពជួរមុខ ដែលកំពុងឈរជើងការពារបូរណភាពទឹកដី ព្រមទាំងបង្ហាញពីស្មារតីសាមគ្គីភាពរវាងកងទ័ព និងប្រជាជន ក៏ដូចជារវាងអាជ្ញាធរមូលដ្ឋាន ព្រះសង្ឃ និងកងកម្លាំងការពារជាតិផងដែរ៕ សាយយ័ន្ត វុន្នីយ៉ា

ពោធិ៍សាត់៖ លោក ឆាយ គឹមម៉ុង អភិបាលស្រុកបាកាន បានអញ្ជើញដឹកនាំក្រុមការងារ ចុះពិនិត្យស្ថានភាពផ្លូវចូលទៅកាន់អធិការដ្ឋាននគរបាលស្រុកបាកាន ដែលស្ថិតនៅក្នុងភូមិកោះកែវ ឃុំត្រពាំងជង ស្រុកបាកាន ខេត្តពោធិ៍សាត់ កាលពីរសៀល ថ្ងៃទី៨ ខែតុលា ឆ្នាំ២០២៦ ។ ការអញ្ជើញចុះពិនិត្យផ្ទាល់ដល់ទីតាំងនេះ គឺធ្វើឡើងក្នុងគោលបំណងរៀបចំផែនការ និងត្រៀមលក្ខណៈជួសជុលស្តារឡើងវិញនូវកំណាត់ផ្លូវមួយខ្សែនេះ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ឱ្យបានកាន់តែងាយស្រួល សុវត្ថិភាព និងចៀសវាងការលំបាកក្នុងរដូវវស្សា។ ក្នុងឱកាសនោះ លោកអភិបាលស្រុក បានផ្តាំផ្ញើ និងណែនាំដល់អាជ្ញាធរមូលដ្ឋាន ព្រមទាំងផ្នែកពាក់ព័ន្ធ ឱ្យយកចិត្តទុកដាក់ពិនិត្យបច្ចេកទេស និងរៀបចំដំណើរការជួសជុលឱ្យបានឆាប់រហ័ស និងមានគុណភាពមាំទាំ ដើម្បីបម្រើផលប្រយោជន៍សាធារណៈ ជាពិសេសប្រជាពលរដ្ឋដែលត្រូវមកទំនាក់ទំនងការងារនៅអធិការដ្ឋាននគរបាលស្រុក ក៏ដូចជាធ្វើដំណើរឆ្លងកាត់ទីនោះជារៀងរាល់ថ្ងៃ៕ សាយយ័ន្ដ វុន្នីយ៉ា

លោក ធាម សុផាត អភិបាលស្រុកភ្នំក្រវាញ បានអញ្ជើញជួបសំណេះសំណាល និងចែកអំណោយដល់បងប្អូនគ្រួសារម៉ូតូឌុប នៅសាលប្រជុំសាលាស្រុកភ្នំក្រវាញ ក្នុងឱកាសបុណ្យភ្ជុំបិណ្ឌ។ ក្នុងនោះ លោកអភិបាលស្រុកបានគាំទ្រ និងលើកទឹកចិត្តដល់របរប្រចាំថ្ងៃរបស់ពួកគាត់ ក្រើនរំលឹកឱ្យមានការប្រុងប្រយ័ត្នខ្ពស់ និងគោរពច្បាប់ចរាចរណ៍ដើម្បីសុវត្ថិភាព ព្រមទាំងបានឧបត្ថម្ភអំណោយដើម្បីជួយសម្រាលបន្ទុកជីវភាពក្នុងឱកាសបុណ្យប្រពៃណីជាតិ។

លោកឧត្តមសេនីយ៍ត្រី ឆាយ សុភ័ក្ដ្រ ស្នងការរងផែនការងារធនធានមនុស្ស តំណាងលោកឧត្តមសេនីយ៍ទោ ស ថេង ស្នងការនគរបាលខេត្ត ជាអនុប្រធាននិងជាប្រធានលេខាធិការដ្ឋានសមាគមអតីតយុវជននិងនិវត្តជនកម្ពុជាខេត្ត បានដឹកនាំកម្លាំងចុះសួរសុខទុក្ខ និងសំណេះសំណាលជាមួយគ្រួសារអតីតយុវជនជាសម្ព័ន្ធមេត្រីភាពចំនួន៩គ្រួសារ ដែលកំពុងរស់នៅភូមិអភិវឌ្ឍន៍ប៊ុនរ៉ានីសែនជ័យដំណាក់ត្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់។

លោក ម៉ាលីយ៉ា សុវត្ថិធី ប្រធានមន្ទីរទេសចរណ៍ខេត្តពោធិ៍សាត់ បានដឹកនាំមន្ត្រីរាជការ ចុះសួរសុខទុក្ខ និងនាំយកអំណោយជាគ្រឿងឧបភោគបរិភោគ និងថវិកា ចែកជូនគ្រួសារសម្ព័ន្ធមេត្រីភាពចំនួន ៨ គ្រួសារ នៅភូមិអភិវឌ្ឍន៍ ប៊ុន រ៉ានី ហ៊ុន សែន ដំណាក់ទ្រយឹង ឃុំព្រងិល ស្រុកភ្នំក្រវាញ។ សកម្មភាពនេះធ្វើឡើងដើម្បីពង្រឹងចំណងសាមគ្គីភាព និងជួយសម្រាលជីវភាពរស់នៅរបស់បងប្អូនប្រជាពលរដ្ឋ និងអតីតយុទ្ធជន។

អភិបាលស្រុកក្រគរ និងក្រុមការងារ បានចុះសួរសុខទុក្ខ និងនាំយកអំណោយឧបត្ថម្ភជូនគ្រួសារសម្ព័ន្ធមេត្រីភាពចំនួន ៨គ្រួសារ នៅភូមិប៊ុនរ៉ានី សែនជ័យដំណាក់ទ្រយឹង ដើម្បីជួយសម្រាលជីវភាពរស់នៅ។នាឱកាសនោះ លោកអភិបាលស្រុកបានផ្តាំផ្ញើសួរសុខទុក្ខ លើកទឹកចិត្តឱ្យខិតខំប្រកបរបរចិញ្ចឹមជីវិត រក្សាសុខភាព និងសហការថែរក្សាសន្តិសុខក្នុងមូលដ្ឋានផងដែរ។