រដ្ឋបាលស្រុកភ្នំក្រវាញ ខេត្តពោធិ៍សាត់ សូមជម្រាបជូនសាធារណជន និងអ្នកសារព័ត៌មាន មេត្តាជ្រាបថា៖ ពាក់ព័ន្ធនឹងការចុះផ្សាយរបស់គេហទំព័រ «អស្ដាយញូស៍-RskyNews.Kh» នាថ្ងៃទី១១ ខែតុលា ឆ្នាំ២០២៦ កន្លងទៅនេះ អំពីករណីប្រជាពលរដ្ឋស្នើសុំឱ្យអាជ្ញាធរជួសជុលផ្លូវមួយខ្សែដែលកំពុងរងការខូចខាត រដ្ឋបាលស្រុកសូមធ្វើការបំភ្លឺ និងជម្រាបជូនអំពីស្ថានភាពពិត និងផែនការដោះស្រាយ។
ក្នុងឱកាសពិធីបុណ្យភ្ជុំបិណ្ឌរយៈពេល៣ថ្ងៃ រមណីដ្ឋានទឹកធ្លាក់ច្រកល្អៀង ក្នុងដែនជម្រកសត្វព្រៃភ្នំឱរ៉ាល់ បានទាក់ទាញភ្ញៀវទេសចរជាតិជាង ៧ពាន់នាក់។ ភាពរៀបរយ សណ្តាប់ធ្នាប់ និងអនាម័យបរិស្ថានដ៏ល្អប្រសើរក្នុងរមណីដ្ឋាននេះ គឺក្រោមការយកចិត្តទុកដាក់ និងកិច្ចសហការរៀបចំពីសំណាក់មន្ត្រីឧទ្យានុរក្សប្រចាំស្នាក់ការយ៉ោក។
ពោធិ៍សាត់៖ ក្រោមការដឹកនាំផ្ទាល់ពី លោកវរសេនីយ៍ទោ ទូច សេងងន នាយការិយាល័យចរាចរណ៍ផ្លូវគោកស្ដីទី នៃស្នងការដ្ឋាននគរបាលខេត្តពោធិ៍សាត់ កម្លាំងជំនាញចរាចរណ៍ផ្លូវគោកបានចុះប្រចាំការនៅតាមគោលដៅសំខាន់ៗ ដើម្បីរៀបចំសណ្ដាប់ធ្នាប់ និងសម្រួលចរាចរណ៍ជូនបងប្អូនប្រជាពលរដ្ឋ ដែលកំពុងធ្វើដំណើរបញ្ចប់ការឈប់សម្រាក និងត្រឡប់ទៅបំពេញការងារវិញនៅរាជធានីភ្នំពេញ នាព្រឹកថ្ងៃទី១៣ ខែតុលា ឆ្នាំ២០២៦។ ការចុះអន្តរាគមន៍និងប្រចាំការនេះ ធ្វើឡើងក្នុងគោលបំណងធានាបាននូវសុវត្ថិភាព សណ្ដាប់ធ្នាប់ និងជួយកាត់បន្ថយការកកស្ទះចរាចរណ៍នៅលើដងផ្លូវជាតិលេខ៥ ក៏ដូចជាកំណាត់ផ្លូវសំខាន់ៗក្នុងភូមិសាស្ត្រខេត្តពោធិ៍សាត់ ព្រមទាំងផ្តល់ភាពងាយស្រួលជូនដល់អ្នកដំណើរក្នុងការធ្វើដំណើរទៅដល់គោលដៅដោយសុវត្ថិភាព។ ជាមួយគ្នានេះដែរ លោកនាយការិយាល័យ ក៏បានក្រើនរំលឹកដល់អ្នកបើកបរយានយន្តគ្រប់ប្រភេទឱ្យបង្កើនការប្រុងប្រយ័ត្នខ្ពស់ គោរពច្បាប់ចរាចរណ៍ មិនត្រូវបើកបរលើសល្បឿនកំណត់ មិនត្រូវស្រវឹងពេលបើកបរ និងត្រូវពាក់ខ្សែក្រវាត់សុវត្ថិភាព ឬមួកសុវត្ថិភាពជានិច្ច ដើម្បីការពារអាយុជីវិត និងទ្រព្យសម្បត្តិរបស់អ្នកដទៃ ក៏ដូចជាខ្លួនឯងផ្ទាល់៕ សាយយ័ន្ដ វុន្នីយ៉ា
ពោធិ៍សាត់៖ លោកស្រី ហាក់ អេងយី មន្ត្រីការិយាល័យចំណេះដឹង និងព័ត៌មានបរិស្ថាន រួមជាមួយមន្ត្រីជាប់កិច្ចសន្យា បានចុះសហការយ៉ាងជិតស្និទ្ធជាមួយរដ្ឋបាលក្រុងពោធិ៍សាត់ ក្នុងការធ្វើសកម្មភាពផ្សព្វផ្សាយ អប់រំ និងសំអាតអនាម័យបរិស្ថាន នៅតាមសួនច្បារសាធារណៈ ខាងមុខកោះសំពៅមាស នាផ្លូវល្ងាចថ្ងៃទី១២ ខែតុលា ឆ្នាំ២០២៦។ ការចុះបេសកកម្មនាពេលនេះ ធ្វើឡើងក្នុងគោលបំណងអប់រំផ្សព្វផ្សាយ និងណែនាំដោយផ្ទាល់ដល់បងប្អូនអាជីវករដែលលក់ដូរនៅតាមសួនច្បារ ឱ្យចូលរួមថែរក្សាអនាម័យ ទុកដាក់សំរាមឱ្យបានត្រឹមត្រូវ និងចូលរួមលើកកម្ពស់សោភ័ណភាពក្រុង។ បន្ថែមពីនេះ ក្រុមការងារក៏បានរួមគ្នាសំអាតបរិស្ថាន ប្រមូលសំរាម និងរៀបចំសណ្តាប់ធ្នាប់នៅជុំវិញបរិវេណសួនច្បារមុខកោះសំពៅមាស ឱ្យមានភាពស្រស់ស្អាត បៃតង និងមានអនាម័យខ្ពស់។ សកម្មភាពនេះ គឺជាការរៀបចំទុកជាមុនយ៉ាងសកម្ម ដើម្បីត្រៀមលក្ខណៈស្វាគមន៍បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ដែលនឹងអញ្ជើញមកកម្សាន្តនៅក្នុងក្រុងពោធិ៍សាត់ នាឱកាសពិធីបុណ្យភ្ជុំបិណ្ឌប្រពៃណីជាតិខាងមុខនេះ ឱ្យទទួលបាននូវបរិយាកាសបរិសុទ្ធ និងមានភាពរីករាយ៕
ពោធិ៍សាត់៖ លោក ធាង ឡេង អភិបាលនៃគណៈអភិបាលស្រុកវាលវែង និងលោកអភិបាលរង រួមជាមួយលោកនាយករដ្ឋបាលស្តីទី ប្រធាន និងអនុប្រធានការិយាល័យចំណុះរដ្ឋបាលស្រុក បានអញ្ជើញចុះប្រគល់ស្បៀង គ្រឿងឧបភោគបរិភោគ បន្លែ និងនំអន្សម ដែលជាអំណោយសប្បុរសធម៌ទទួលបានពីព្រះចៅអធិការវត្តមួយចំនួនក្នុងស្រុកវាលវែង ជូនដល់វីរជនកងទ័ពជួរមុខ ដែលជាអង្គភាពសហសម្ព័ន្ធមេត្រីភាពជាមួយរដ្ឋបាលស្រុកវាលវែង នាថ្ងៃទី១២ ខែតុលា ឆ្នាំ២០២៦។ អំណោយស្បៀង និងសម្ភារដែលបានប្រគល់ រួមមាន៖ អង្ករ ៣៥០ គីឡូក្រាម, បន្លែចម្រុះ ១៥០ គីឡូក្រាម, អន្សម ៥០០ ដើម, មីកញ្ចប់ ១១ កេះ, ទឹកផ្លែឈើ ៧ កេះ, ទឹកបរិសុទ្ធ ៤ កេះ, ទឹកបរិសុទ្ធ ៧ យួរ, ទឹកស៊ីអ៊ីវ ១០ យួរ, ទឹកត្រី ២ យួរ, សៀង ១០ គីឡូក្រាម, នឹង ទឹកដោះគោខាប់ ៥ កំប៉ុង។ សកម្មភាពចុះជួបសំណេះសំណាល និងនាំយកអំណោយឧបត្ថម្ភនេះ គឺដើម្បីជាការរួមចំណែកលើកទឹកចិត្ត និងឆ្លើយតបចំពោះការលះបង់ដ៏ធំធេងរបស់កងទ័ពជួរមុខ ដែលកំពុងឈរជើងការពារបូរណភាពទឹកដី ព្រមទាំងបង្ហាញពីស្មារតីសាមគ្គីភាពរវាងកងទ័ព និងប្រជាជន ក៏ដូចជារវាងអាជ្ញាធរមូលដ្ឋាន ព្រះសង្ឃ និងកងកម្លាំងការពារជាតិផងដែរ៕ សាយយ័ន្ត វុន្នីយ៉ា
