បាត់ដំបង៖ គិតត្រឹមម៉ោង ១០:០០ យប់ ថ្ងៃទី០៧ ខែតុលា ឆ្នាំ២០២៦ នេះ កម្លាំងសមត្ថកិច្ច ប្រជាពលរដ្ឋ និងសាច់ញាតិ នៅតែមិនទាន់រកឃើញលោកមេភូមិត្រាង ឃុំអូរតាគី នៅឡើយទេ ក្រោយពីគាត់បានជួបគ្រោះថ្នាក់លិចទូកស្មាច់ កាលពីវេលាម៉ោងប្រមាណ ០៨:០០ ព្រឹក ថ្ងៃដដែល នៅចំណុចខាងក្រោយវត្តត្រស់។
ពោធិ៍សាត់៖ រដ្ឋបាលក្រុងពោធិ៍សាត់ សូមអំពាវនាវ និងក្រើនរំលឹកដល់បងប្អូនប្រជាពលរដ្ឋ អាជីវករ ព្រមទាំងភ្ញៀវទេសចរទាំងអស់ក្នុងក្រុងពោធិ៍សាត់ ចូលរួមលើកកម្ពស់សោភ័ណភាព បរិស្ថាន និងអនាម័យសាធារណៈ តាមរយៈការអនុវត្តចំណុចសំខាន់ៗដូចខាងក្រោម៖ ១. ទុកដាក់សំរាមឲ្យបានត្រឹមត្រូវ៖ សូមច្រកសំរាមក្នុងថង់ ឬធុងសំរាមឲ្យបានជិតល្អ រួចយកទៅដាក់តាមទីតាំង និងពេលវេលាដែលបានកំណត់។ ២. បញ្ឈប់ការបោះចោលពាសវាលពាសកាល៖ ជៀសវាងដាច់ខាតការបោះចោលសំរាម ឬសំណល់ផ្សេងៗលើដងផ្លូវ ទីសាធារណៈ ឬចាក់ចូលក្នុងប្រឡាយទឹកស្អុយ។ ៣. អនាម័យផ្ទាល់ខ្លួន និងទីតាំង៖ ចូលរួមសសម្អាតអនាម័យនៅមុខផ្ទះ និងតូបលក់ដូររបស់ខ្លួនជាប្រចាំ។ រដ្ឋបាលក្រុងពោធិ៍សាត់ សង្ឃឹមយ៉ាងមុតមាំថា បងប្អូនប្រជាពលរដ្ឋ និងអាជីវករទាំងអស់ នឹងចូលរួមអនុវត្តប្រកបដោយស្មារតីទទួលខុសត្រូវខ្ពស់ ព្រោះ «ទីក្រុងស្អាត ផ្តើមចេញពីស្មារតីទទួលខុសត្រូវរបស់យើងទាំងអស់គ្នា»៕
កំពត៖ លោក ប៊ិន ស៊ិនណារ៉ា ប្រធានការិយាល័យផលិតកម្ម និងបសុព្យាបាលស្តីទី និងកញ្ញា ឡាយ ដាវីន មន្ត្រីការិយាល័យ បានអញ្ជើញចូលរួមសិក្ខាសាលាស្តីពី «ផែនការអាជីវកម្មរបស់មជ្ឈមណ្ឌលជាតិផលិតវ៉ាក់សាំងសត្វ» ដែលបានប្រព្រឹត្តទៅនៅសណ្ឋាគារ សាន់នី ខេត្តកំពត នៅថ្ងៃទី៧ ខែតុលា ឆ្នាំ២០២៦។ សិក្ខាសាលានេះមានរយៈពេល ៣ថ្ងៃ ចាប់ពីថ្ងៃទី៦ ដល់ថ្ងៃទី៨ ខែតុលា ឆ្នាំ២០២៦ ដោយមានការអញ្ជើញចូលរួមពីទីប្រឹក្សាគម្រោងសុខភាពសត្វឆ្លងកាត់ព្រំដែន និងការជំរុញខ្សែច្រវាក់តម្លៃសត្វ ព្រមទាំងតំណាងការិយាល័យផលិតកម្ម និងបសុព្យាបាលមកពី ៩ ខេត្ត រួមមាន៖ កំពង់ឆ្នាំង ពោធិ៍សាត់ តាកែវ កណ្តាល កំពង់ចាម សៀមរាប ឧត្តរមានជ័យ ព្រៃវែង និងខេត្តកំពត សរុបអ្នកចូលរួមចំនួន ៣៥ នាក់ (ស្រី ៥ នាក់)។ សិក្ខាសាលានេះរៀបចំឡើងក្នុងគោលបំណងសំខាន់ៗដូចខាងក្រោម៖ រៀបចំផែនការពាណិជ្ជកម្មនៃការផលិតវ៉ាក់សាំងសត្វឱ្យបានត្រឹមត្រូវ និងមានប្រសិទ្ធភាព, កាត់បន្ថយការពឹងផ្អែកលើការនាំចូលវ៉ាក់សាំងសត្វពីបរទេស, លើកកម្ពស់សមត្ថភាពប្រកួតប្រជែងផលិតកម្មក្នុងស្រុក និងធានាការផ្គត់ផ្គង់វ៉ាក់សាំងដែលមានគុណភាពខ្ពស់ និងសុវត្ថិភាពជូនប្រជាកសិករ៕
នាព្រឹកព្រលឹមស្រាងៗ វត្តហ្លួង សង្កាត់លលកស ក្រុងពោធិ៍សាត់ បានរៀបចំពិធីបោះបាយបិណ្ឌ (បិណ្ឌ១២) ក្រោមការដឹកនាំរបស់ព្រះគ្រូ ខាត់ ខេមរា ព្រះចៅអធិការវត្ត និងមានការពុទ្ធបរិស័ទចូលរួមយ៉ាងកុះករ។ ពិធីនេះធ្វើឡើងដើម្បីឧទ្ទិសកុសលជូនញាតិកាប្រាំពីរសណ្តាន ប្រេតពាលី ព្រមទាំងវិញ្ញាណក្ខន្ធវីរកងទ័ពជួរមុខដែលបានពលីជីវិតការពារជាតិ។ ជាមួយគ្នានោះ ព្រះគ្រូអធិការវត្តបានអំពាវនាវឱ្យយុវជន និងពុទ្ធបរិស័ទជួយថែរក្សាមរតកវប្បធម៌ប្រពៃណីជាតិ និងស្វែងយល់ពី បរាភវសូត្រ ដើម្បីចៀសវាងអំពើអបាយមុខ និងការធ្លាក់ចុះថោកទាបក្នុងជីវិត។
លោក ងួន ប៉ោសេង អភិបាលរងនៃគណៈអភិបាលខេត្តពោធិ៍សាត់ និងជាប្រធានក្រុមការងារថ្នាក់ខេត្ត ចុះមូលដ្ឋានសង្កាត់ព្រៃញី រួមជាមួយលោកអនុប្រធាន និងសមាជិក សមាជិកា ក្រុមការងារបានអញ្ជើញចូលរួមក្នុងពិធីសូត្រមន្ត បិណ្ឌទី១២ និងជួបសំណេះសំណាល នាំយកអំណោយមនុស្សធម៌ មកចែកជូនដល់បងប្អូនប្រជាពលរដ្ឋ ក្នុងសង្កាត់ព្រៃញី ក្រុងពោធិ៍សាត់ចំនួន៣៥០គ្រួសារ ដែលបានប្រារព្ធធ្វើនៅ វត្តស្រះស្រង់។
