អភិបាលស្រុកតាលោសែនជ័យ ដឹកនាំក្រុមការងារពិនិត្យវឌ្ឍនភាពការងារសង្គម ហេដ្ឋារចនាសម្ព័ន្ធ និងនាំយកជំនួយមនុស្សធម៌ជូនគ្រួសាររងគ្រោះ
ពោធិ៍សាត់៖ លោក ចាន់ វិចិត្រ អភិបាលនៃគណៈអភិបាលស្រុកតាលោសែនជ័យ បានអញ្ជើញដឹកនាំក្រុមការងាររដ្ឋបាលស្រុក ចុះបំពេញបេសកកម្មការងារជាច្រើននៅតាមមូលដ្ឋាន ដើម្បីសម្រេចបានទាំងសមិទ្ធផលសាសនា ការអប់រំ និងការជួយសង្គ្រោះប្រជាពលរដ្ឋ នាព្រឹកថ្ងៃអង្គារ ទី១ ខែកញ្ញា ឆ្នាំ២០២៦។ ក្នុងឱកាសនោះ លោកអភិបាលស្រុក បានដឹកនាំរៀបចំពិធីសែនព្រេនតាមប្រពៃណី ដើម្បីចាប់ផ្តើមដំណើរការជួសជុល និងកែលម្អខ្លោងទ្វារវត្តបត់រំដួល ឱ្យមានសោភ័ណភាពប្រសើរឡើងវិញ។ បន្ទាប់មក លោកនិងក្រុមការងារបានចុះពិនិត្យវឌ្ឍនភាពការងារនៅសាលាបឋមសិក្សាព្រៃរោង ដើម្បីតាមដាន និងលើកកម្ពស់គុណភាពហេដ្ឋារចនាសម្ព័ន្ធសិក្សារបស់សិស្សានុសិស្សនៅក្នុងមូលដ្ឋាន។ ជាមួយគ្នានោះ ឆ្លើយតបទៅនឹងទុក្ខលំបាករបស់ប្រជាពលរដ្ឋ លោក ចាន់ វិចិត្រ ក៏បាននាំយកគ្រឿងឧបភោគបរិភោគ សម្ភារៈប្រើប្រាស់ប្រចាំថ្ងៃ និងថវិកាមួយចំនួន ជូនដល់គ្រួសារក្រីក្រដែលបានរងគ្រោះធម្មជាតិប៉ះពាល់ផ្ទះសម្បែង ព្រមទាំងបានជួយសាងសង់ផ្ទះថ្មីជូន ដើម្បីជួយឱ្យពួកគាត់មានជម្រកស្នាក់នៅសមរម្យ និងមានស្ថិរភាពជីវភាពឡើងវិញ៕
