អាជ្ញាធរខេត្តពោធិ៍សាត់ ចុះអន្តរាគមន៍នាំទឹកសង្គ្រោះស្រូវវស្សាកំពុងប្រឈមការខ្វះខាត នៅស្រុកបាកាន

ពោធិ៍សាត់៖ លោក លឹម សុខតូ អភិបាលរងខេត្តពោធិ៍សាត់ រួមដំណើរដោយលោក គិត ផល អនុប្រធានក្តាប់រួមមន្ទីរធនធានទឹក និងឧតុនិយមខេត្ត ព្រមទាំងអាជ្ញាធរមូលដ្ឋាន បានចុះពិនិត្យស្ថានភាពជាក់ស្តែង និងដឹកនាំការអន្តរាគមន៍ជួយសង្គ្រោះស្រូវរដូវវស្សារបស់ប្រជាកសិករ ស្ថិតក្នុងឃុំមេទឹក ស្រុកបាកាន ខេត្តពោធិ៍សាត់ នាថ្ងៃទី១៨ ខែសីហា ឆ្នាំ២០២៦។ ការចុះអន្តរាគមន៍បន្ទាន់នេះ ធ្វើឡើងបន្ទាប់ពីពិនិត្យឃើញថា ផ្ទៃដីស្រែនៅក្នុងតំបន់នោះស្ថិតនៅឆ្ងាយពីប្រភពទឹក និងពុំទទួលបានរបបទឹកភ្លៀងគ្រប់គ្រាន់ ខណៈដែលស្រូវកំពុងស្ថិតក្នុងវគ្គត្រៀមបែកគុម្ភ និងចេញផ្កា ដែលតម្រូវឱ្យមានការជួយសង្គ្រោះជាប្រញាប់។ កន្លងមក ប្រជាកសិករបានខិតខំដោះស្រាយដោយខ្លួនឯង តាមរយៈការបូមទឹកចេញពីអូរ និងប្រឡាយបញ្ចូលស្រែ។ មន្ទីរជំនាញបានសហការយ៉ាងជិតស្និទ្ធជាមួយអាជ្ញាធរដែនដី ដើម្បីចាត់ចែងបូម និងបែងចែកប្រភពទឹកសង្គ្រោះស្រូវឱ្យបានទាន់ពេលវេលា។ ឱកាសនោះដែរ លោកអភិបាលរងខេត្ត បានណែនាំដល់មន្ត្រីជំនាញ និងអាជ្ញាធរពាក់ព័ន្ធទាំងអស់ ត្រូវបន្តសហការគ្នាឱ្យបានស្អិតល្មួតក្នុងការគ្រប់គ្រង និងបែងចែកទឹកដោយសមធម៌ ដើម្បីធានាថាគ្រប់តំបន់ដែលរងផលប៉ះពាល់សុទ្ធតែទទួលបានទឹកស្រោចស្រពគ្រប់គ្រាន់៕