ឯកឧត្តម ខូយ រីដា ចុះពិនិត្យការដ្ឋានផ្លូវជនបទថ្មី អន្តរាគមន៍បញ្ហាទឹកជួយកសិករ និងសាកសួរសុខទុក្ខប្រជាពលរដ្ឋនៅតំបន់ដាច់ស្រយាលក្នុងស្រុកកណ្តៀង

ខេត្តពោធិ៍សាត់៖ ក្នុងសកម្មភាពចុះជាប់ជាមួយមូលដ្ឋាន ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះពិនិត្យផ្ទាល់នូវវឌ្ឍនភាពនៃការដ្ឋានសាងសង់ផ្លូវថ្នល់ថ្មី ដែលជាកញ្ចប់ថវិការបស់រាជរដ្ឋាភិបាល តាមរយៈក្រសួងអភិវឌ្ឍន៍ជនបទ ដើម្បីជួយសម្រួលដល់ការធ្វើដំណើរ និងដឹកជញ្ជូនកសិផលរបស់ប្រជាពលរដ្ឋ។ ទន្ទឹមនឹងនោះ ឯកឧត្តមអភិបាលខេត្ត ក៏បានចុះពិនិត្យលទ្ធភាពជាក់ស្តែងក្នុងការជួយអន្តរាគមន៍សង្គ្រោះ បញ្ជូនប្រភពទឹកជួយដល់បងប្អូនប្រជាកសិករដែលកំពុងរងគ្រោះដោយសារកត្តាអាកាសធាតុរាំងស្ងួត ក្នុងការបង្កបង្កើនផល។ ក្នុងឱកាសនោះដែរ ឯកឧត្តមបានឆ្លៀតឱកាសចុះជួបសំណេះសំណាល សាកសួរសុខទុក្ខយ៉ាងស្និទ្ធស្នាល និងស្វែងយល់ពីជីវភាពរស់នៅរបស់បងប្អូនប្រជាពលរដ្ឋនៅក្នុងភូមិថ្មី ឃុំស្រែស្តុក ស្រុកកណ្តៀង ដែលជាភូមិដាច់ស្រយាលឆ្ងាយពីទីប្រជុំជន។ សមិទ្ធផលហេដ្ឋារចនាសម្ព័ន្ធខ្វាត់ខ្វែង និងសកម្មភាពយកចិត្តទុកដាក់ចំពោះសុខទុក្ខរបស់ប្រជាពលរដ្ឋគ្រប់ច្រកល្ហកទាំងអស់នេះ គឺបានមកពីផ្លែផ្កា និងបញ្ជាក់យ៉ាងច្បាស់ពីតម្លៃមិនអាចកាត់ថ្លៃបាននៃ សុខសន្តិភាព៕