ពោធិ៍សាត់៖ នាព្រឹកថ្ងៃទី៣ ខែវិច្ឆិកា ឆ្នាំ២០២៦ នៅបញ្ជាការដ្ឋានកងរាជអាវុធហត្ថខេត្ត លោកវរសេនីយ៍ឯក សុខ ម៉េងឡុង មេបញ្ជាការស្ដីទីកងរាជអាវុធហត្ថខេត្តពោធិ៍សាត់ បានដឹកនាំកិច្ចប្រជុំផ្សព្វផ្សាយផែនការ ការពារសន្តិសុខ និងរក្សាសណ្ដាប់ធ្នាប់ ជូនសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាល ចែកពូជស្រូវ និងស្បៀងជូនប្រជាពលរដ្ឋ ដែលរងផលប៉ះពាល់ដោយជំនន់ទឹកភ្លៀង ស្ថិតក្នុងសង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។ កិច្ចប្រជុំនេះ ក៏មានសមាសភាពចូលរួមយ៉ាងកុះករផងដែរ រួមមាន៖ លោកមេបញ្ជាការរង ប្រធាន អនុប្រធានមន្ទីរ នាយ នាយរងការិយាល័យ មេបញ្ជាការមូលដ្ឋានកងរាជអាវុធហត្ថក្រុង-ស្រុក និងមេបញ្ជាការកងអនុសេនាធំចល័ត ដើម្បីកំណត់ផែនការសកម្មភាព និងការចាត់តាំងកម្លាំងអន្តរាគមន៍ការពារឱ្យបានហ្មត់ចត់ធានាបាននូវសុវត្ថិភាព សន្តិសុខ និងសណ្តាប់ធ្នាប់សង្គមក្នុងដំណើរអញ្ជើញចុះសំណេះសំណាល និងចែកអំណោយដល់ប្រជាពលរដ្ឋរងគ្រោះប្រកបដោយជោគជ័យ និងសុវត្ថិភាពពេញលេញ៕

នៅបញ្ជាការដ្ឋានកងរាជអាវុធហត្ថខេត្តពោធិ៍សាត់ បានរៀបចំពិធីផ្សព្វផ្សាយការងារសោធននិវត្តន៍ ឆ្នាំ២០២៧ ក្រោមអធិបតីភាព លោកស្រីឧត្តមសេនីយ៍ទោ ហ៊ាង ឆវី មេបញ្ជាការរងកងរាជអាវុធហត្ថលើផ្ទៃប្រទេស និងជាតំណាងឯកឧត្តម នាយឧត្តមសេនីយ៍ សៅ សុខា ដោយមានការចូលរួមពី លោកវរសេនីយ៍ឯក សុខ ម៉េងឡុង មេបញ្ជាការស្តីទីខេត្ត ព្រមទាំងថ្នាក់ដឹកនាំ មេបញ្ជាការក្រុង-ស្រុក និងមន្ត្រីពាក់ព័ន្ធជាច្រើនរូបទៀត។

ស្នងការនគរបាលខេត្ត បានដឹកនាំកិច្ចប្រជុំប្រចាំខែ ដោយបានណែនាំដល់កងកម្លាំងនគរបាលទាំងអស់ ឱ្យពង្រឹងវិន័យ ក្រមសីលធម៌ និងជៀសឱ្យឆ្ងាយពីគ្រឿងញៀន ឬបទល្មើសផ្សេងៗ។ លោកក៏បានជំរុញឱ្យយកចិត្តទុកដាក់ថែរក្សាអនាម័យបរិស្ថាននៅតាមប៉ុស្តិ៍ ផ្សព្វផ្សាយគោលនយោបាយ «ភូមិ-ឃុំមានសុវត្ថិភាព» និងបង្ការទប់ស្កាត់បទល្មើសគ្រប់ប្រភេទក្នុងមូលដ្ឋានឱ្យមានប្រសិទ្ធភាពខ្ពស់។

ក្រោមការណែនាំរបស់លោកអភិបាលក្រុង ក្រុមការងារសង្កាត់ស្វាយអាត់បានបន្តប្រចាំការសម្រួលចរាចរណ៍នៅចំណុចផ្លូវបែកជាបួនយ៉ាងសកម្ម និងប្រកបដោយស្មារតីទទួលខុសត្រូវខ្ពស់ ក្នុងរយៈពេល៤ថ្ងៃនៃឱកាសបុណ្យភ្ជុំបិណ្ឌ ដើម្បីធានាសុវត្ថិភាព និងភាពរលូនជូនប្រជាពលរដ្ឋ ទោះបីជួបប្រទះកម្ដៅថ្ងៃ និងភ្លៀងរលឹមក៏ដោយ។

ពោធិ៍សាត់៖ ក្រោមការដឹកនាំផ្ទាល់ពី លោកវរសេនីយ៍ទោ ទូច សេងងន នាយការិយាល័យចរាចរណ៍ផ្លូវគោកស្ដីទី នៃស្នងការដ្ឋាននគរបាលខេត្តពោធិ៍សាត់ កម្លាំងជំនាញចរាចរណ៍ផ្លូវគោកបានចុះប្រចាំការនៅតាមគោលដៅសំខាន់ៗ ដើម្បីរៀបចំសណ្ដាប់ធ្នាប់ និងសម្រួលចរាចរណ៍ជូនបងប្អូនប្រជាពលរដ្ឋ ដែលកំពុងធ្វើដំណើរបញ្ចប់ការឈប់សម្រាក និងត្រឡប់ទៅបំពេញការងារវិញនៅរាជធានីភ្នំពេញ នាព្រឹកថ្ងៃទី១៣ ខែតុលា ឆ្នាំ២០២៦។ ការចុះអន្តរាគមន៍និងប្រចាំការនេះ ធ្វើឡើងក្នុងគោលបំណងធានាបាននូវសុវត្ថិភាព សណ្ដាប់ធ្នាប់ និងជួយកាត់បន្ថយការកកស្ទះចរាចរណ៍នៅលើដងផ្លូវជាតិលេខ៥ ក៏ដូចជាកំណាត់ផ្លូវសំខាន់ៗក្នុងភូមិសាស្ត្រខេត្តពោធិ៍សាត់ ព្រមទាំងផ្តល់ភាពងាយស្រួលជូនដល់អ្នកដំណើរក្នុងការធ្វើដំណើរទៅដល់គោលដៅដោយសុវត្ថិភាព។ ជាមួយគ្នានេះដែរ លោកនាយការិយាល័យ ក៏បានក្រើនរំលឹកដល់អ្នកបើកបរយានយន្តគ្រប់ប្រភេទឱ្យបង្កើនការប្រុងប្រយ័ត្នខ្ពស់ គោរពច្បាប់ចរាចរណ៍ មិនត្រូវបើកបរលើសល្បឿនកំណត់ មិនត្រូវស្រវឹងពេលបើកបរ និងត្រូវពាក់ខ្សែក្រវាត់សុវត្ថិភាព ឬមួកសុវត្ថិភាពជានិច្ច ដើម្បីការពារអាយុជីវិត និងទ្រព្យសម្បត្តិរបស់អ្នកដទៃ ក៏ដូចជាខ្លួនឯងផ្ទាល់៕ សាយយ័ន្ដ វុន្នីយ៉ា

សូមអំពាវនាវដល់បងប្អូនប្រជាពលរដ្ឋដែលធ្វើដំណើរតាមផ្លូវជាតិលេខ៥ វិលត្រលប់មកទីក្រុងភ្នំពេញវិញ សូមបង្កើនការប្រុងប្រយ័ត្ន គោរពច្បាប់ចរាចរណ៍ដើម្បីសុវត្ថិភាព និងចូលរួមរក្សាអនាម័យដោយមិនត្រូវបោះចោលសំរាមពាសវាលពាសកាល ឬក្នុងលូឡើយ។