ពោធិ៍សាត់៖ «ផ្លូវអន្ទង់អាំង» ឬដែលមហាជនទូទៅស្គាល់ថា «ផ្លូវបុប្ផាលាក់ខ្លួន» នៅតំបន់ភ្នំ១៥០០ បាននិងកំពុងបន្តទាក់ទាញអារម្មណ៍ភ្ញៀវទេសចរជិតឆ្ងាយយ៉ាងខ្លាំង តាមរយៈភាពស្រស់ស្អាតនៃទេសភាពធម្មជាតិ និងរចនាបថផ្លូវពត់ពេនយ៉ាងប្លែកភ្នែក។ ស្ថិតនៅតាមបណ្តោយផ្លូវជាតិលេខ៥៥ ក្នុងស្រុកវាលវែង ខេត្តពោធិ៍សាត់ ផ្លូវមួយខ្សែនេះមានលក្ខណៈពិសេសត្រង់ការរចនាបត់បែនកោងញឹកញាប់ដូចសត្វអន្ទង់អាំង ឆ្លងកាត់ជួរភ្នំ និងព្រៃព្រឹក្សាដ៏ខៀវស្រងាត់។ ទិដ្ឋភាពធម្មជាតិដ៏ស្រស់បំព្រង និងខ្យល់អាកាសបរិសុទ្ធនៅតំបន់នេះ បានធ្វើឱ្យផ្លូវអន្ទង់អាំងក្លាយជាចំណុចទាក់ទាញទេសចរយ៉ាងសំខាន់ និងជាកន្លែងឈប់សម្រាកថតរូបកម្សាន្តដែលមិនអាចរំលងបាន សម្រាប់អ្នកធ្វើដំណើរឆ្ពោះទៅកាន់ស្រុកវាលវែង និងតំបន់ថ្មដា។ គួររំលឹកផងដែរថា តំបន់អន្ទង់អាំងនៅភ្នំ១៥០០នេះ ត្រូវបានរាជរដ្ឋាភិបាលកំណត់រក្សាទុកជាតំបន់សាធារណៈរបស់រដ្ឋ ដើម្បីរៀបចំដាំដើមឈើឡើងវិញ និងអភិវឌ្ឍទៅជាតំបន់ទេសចរណ៍ធម្មជាតិដ៏ប្រណិត សម្រាប់បម្រើដល់ការកម្សាន្តរបស់ប្រជាពលរដ្ឋ និងភ្ញៀវទេសចរជាតិ-អន្តរជាតិ៕

ពោធិ៍សាត់៖ រូបភាពទិដ្ឋភាពពីលើអាកាស នាពេលរាត្រីបានរំលេចនូវសម្រស់ដ៏ទាក់ទាញ និងការអភិវឌ្ឍយ៉ាងឆាប់រហ័សនៃក្រុងពោធិ៍សាត់ ខេត្តពោធិ៍សាត់ តាមរយៈពន្លឺភ្លើងអគ្គិសនីពណ៌ចម្រុះយ៉ាងប្រណិត លើបណ្តោយស្ទឹងពោធិ៍សាត់ និងតំបន់រមណីយដ្ឋានជុំវិញ។ ស្ពានឆ្លងស្ទឹងពោធិ៍សាត់ដ៏វែងអនឡាយ ជាមួយនឹងការបំពាក់អំពូលភ្លើងបំភ្លឺសាធារណៈយ៉ាងភ្លឺស្វាងនៅតាមបណ្តោយស្ពាន និងខ្សែផ្លូវថ្នល់។ ទិដ្ឋភាពនេះមិនត្រឹមតែបង្ហាញពីភាពស្រស់ស្អាតនៃការរៀបចំទីក្រុងប៉ុណ្ណោះទេ ប៉ុន្តែថែមទាំងស្តែងចេញពីការរីកចម្រើនផ្នែកហេដ្ឋារចនាសម្ព័ន្ធផ្លូវស្ពាន សម្រួលដល់ការធ្វើដំណើរកម្សាន្ត និងចរាចរណ៍របស់ប្រជាពលរដ្ឋនាពេលរាត្រីប្រកបដោយសុវត្ថិភាព។ សម្រស់ «កោះសំពៅមាស» ដែលជាតំបន់រមណីយដ្ឋានវប្បធម៌ និងកម្សាន្តដ៏ល្បីល្បាញប្រចាំខេត្តពោធិ៍សាត់។ ទីតាំងនេះមានទម្រង់រូបរាងដូចជាសំពៅធំមួយស្ថិតនៅចំកណ្តាលស្ទឹងពោធិ៍សាត់ ដែលត្រូវ​បានរៀបចំដេញអំពូលភ្លើងពណ៌ចម្រុះយ៉ាងមានរបៀបរៀបរយ អមដោយស្ពានតភ្ជាប់ទៅកាន់កោះ និងភ្លើងលម្អជុំវិញមាត់ស្ទឹង បង្កើតបានជាផ្ទាំងទស្សនីយភាពដ៏ស្អាតប្លែក និងជាទីតាំងទាក់ទាញភ្ញៀវទេសចរឱ្យមកទស្សនាកម្សាន្តយ៉ាងកុះករ៕

ពិធីបិទវគ្គបណ្តុះបណ្តាល «ហូកា» លើជំនាញ ការិយាល័យជួរមុខ និងបានប្រគល់វិញ្ញាបនបត្រជូនសិក្ខាកាមចំនួន ១៧នាក់ (ស្រី ១០នាក់) នៅសាលបណ្ឌិត ថោង ខុន។ វគ្គសិក្សារយៈពេល ៣ថ្ងៃនេះ ទទួលបានការឧបត្ថម្ភពីអង្គការ Swisscontact ក្នុងគោលបំណងពង្រឹងសមត្ថភាព និងគុណភាពសេវាកម្មដល់ប្រតិបត្តិករ និងសេវាករទេសចរណ៍ក្នុងខេត្តពោធិ៍សាត់។

ពោធិ៍សាត់៖ នៅសាលបណ្ឌិត ថោង ខុន នៃមន្ទីរទេសចរណ៍ខេត្តពោធិ៍សាត់ បានរៀបចំពិធីបើកវគ្គបណ្តុះបណ្តាលហូកា (HoKa) លើជំនាញ «ការិយាល័យជួរមុខ» ក្រោមអធិបតីភាព លោកប្រធានមន្ទីរទេសចរណ៍ខេត្តពោធិ៍សាត់ កាលពីថ្ងៃទី២៨ ខែកញ្ញា ឆ្នាំ២០២៦។ ពិធីនេះក៏មានការអញ្ជើញចូលរួមពីសំណាក់មន្ត្រីរាជការនៃមន្ទីរទេសចរណ៍ខេត្ត ព្រមទាំងសិក្ខាកាមជាប្រតិបត្តិករ និងសេវាករទេសចរណ៍ក្នុងខេត្តសរុបចំនួន ១៧នាក់ (ក្នុងនោះមានស្ត្រីចំនួន ១០នាក់)។ វគ្គបណ្តុះបណ្តាលដ៏មានសារៈសំខាន់នេះ រៀបចំឡើងក្រោមការគាំទ្រឧបត្ថម្ភពីអង្គការស្វីសខន់ថាក់ (Swisscontact) ក្នុងគោលបំណងពង្រឹងសមត្ថភាព ជំនាញបច្ចេកទេស និងការផ្តល់សេវាកម្មប្រកបដោយគុណភាព និងវាយ៉ាងរ៉ាប់រងដល់ភ្ញៀវទេសចរជាតិ និងអន្តរជាតិដែលមកកម្សាន្តក្នុងខេត្តពោធិ៍សាត់។ តាមរយៈវគ្គបណ្តុះបណ្តាលជំនាញ «ការិយាល័យជួរមុខ» នេះ សិក្ខាកាមទាំងអស់នឹងទទួលបាននូវចំណេះដឹង បទពិសោធន៍ និងបច្ចេកទេសថ្មីៗក្នុងការទទួលបដិសណ្ឋារកិច្ច ការសម្របសម្រួល និងការដោះស្រាយបញ្ហាផ្សេងៗនៅកន្លែងធ្វើការ ដើម្បីរួមចំណែកលើកកម្ពស់វិស័យទេសចរណ៍ក្នុងខេត្តឱ្យកាន់តែមានភាពទាក់ទាញ និងរីកចម្រើនបន្ថែមទៀត៕

មន្ទីរទេសចរណ៍ខេត្តពោធិ៍សាត់ បានរៀបចំកិច្ចប្រជុំបូកសរុបលទ្ធផលការងារប្រចាំខែកញ្ញា និងលើកទិសដៅខែតុលា ឆ្នាំ២០២៦ ក្រោមអធិបតីភាពលោកប្រធានមន្ទីរ ដោយមានការចូលរួមពីថ្នាក់ដឹកនាំ ប្រធាន-អនុប្រធានការិយាល័យ និងមន្ត្រីកិច្ចសន្យា។ កិច្ចប្រជុំនេះធ្វើឡើងដើម្បីពិនិត្យវាយតម្លៃសមិទ្ធផលការងារកន្លងមក ដោះស្រាយបញ្ហាប្រឈម និងកំណត់ផែនការសកម្មភាពថ្មីៗ ដើម្បីលើកកម្ពស់វិស័យទេសចរណ៍ក្នុងខេត្តឱ្យកាន់តែប្រសើរឡើង។

ទិដ្ឋភាពពីខាងលើបង្ហាញឱ្យឃើញនូវការរៀបចំទីក្រុងប្រកបដោយសណ្តាប់ធ្នាប់ ជាមួយនឹងលំនៅដ្ឋាន និងសំណង់អាគារជាច្រើនដែលកំពុងលេចចេញឡើងជាបន្តបន្ទាប់។ រង្វង់មូលដំរីស្ថិតនៅចំកណ្តាលនៃចរាចរណ៍ដែលកំពុងតែមមាញឹក ដោយមានផ្លូវថ្នល់ខ្វាត់ខ្វែងតភ្ជាប់ទៅកាន់តំបន់ផ្សេងៗ។ អ្វីដែលធ្វើឱ្យទិដ្ឋភាពនេះកាន់តែពិសេសគឺការហ៊ុំព័ទ្ធដោយភ្នំធម្មជាតិដ៏ខ្ពស់ត្រដែត និងព្រៃឈើខៀវស្រងាត់ ដែលបង្កើតបានជាទេសភាពដ៏អស្ចារ្យ និងស្រស់ត្រកាល។